குறை தீர்க்கும் குடில் ``சமயாள் குடில்”

குறை தீர்க்கும் குடில் ``சமயாள் குடில்”

ஆன்மீகபெருமக்களின்திருத்தாழ் வணங்கி, அன்னையின் திருக்கோட்ட ஸ்தல வரலாற்றை அடியார்களின் திருப்பாதங்களில் சமர்ப்பிக்கின்றேன்.

முன்னொரு காலத்தில் கோச்சடை மாறவர்மன் சுந்தரபாண்டிய மன்னன் ஆண்ட காலங்கள் ஒட்டி, கூடல்மாநகருக்கு மேற்கு எல்லையாக பிராட்டியார் பத்து (தற்பொழுது விராட்டிப்பத்து) என்று மதுரை பாண்டியநாட்டின் மேற்கு எல்லையாக வைத்தும் அங்கு எல்லைக்காளி என்ற ஆலயத்தை உருவாக்கியதாகவும், வீதியுடைய அய்யனார் கோயிலும் முத்தையன் திருக்கோயிலும் 21 பந்தி 61 தெய்வநிலைகளும் சான்றுகளாக விளங்குகிறது. இன்றும் நாகமலை தடாக நாச்சியார் உலவுகின்ற எல்லையாக இருப்பதாக மக்கள் இன்றும் கூறுவதுண்டு.

கூடல் மாநகரில் கொடூரமாக தன் கணவன் கோவலன் கொலை செய்யப்பட்டதால் கற்புடைய தெய்வமாம் கண்ணகி தன் சக்தியெல்லாம் ஒன்று திரட்டி இவ்வுலகரிய அக்னியால் மதுரையை எரியூட்டிய பின் மலைநாடு (கேரளா) செல்லுமுன் பாண்டிப்பதியின் எல்லையின் வெளியில் நின்று கோவலன் கொலை செய்யப்பட்ட இடத்தையும் (கோவலன் பொட்டல்) தன் ஆற்றல் சக்தியால் எரியூட்டப்பட்ட மதுரையையும் பார்த்தபின், இந்த ஸ்தலத்தில் நின்று தன் சக்தியையும் தர்மத்தையும் நிலைநிறுத்தி இவ்விடம் சக்தி பீடமாகவும், சத்திய தர்ம உண்மையை நிலைநாட்ட வீற்றிருப்பதாகவும், எதை வேண்டி, விரும்பி, கேட்டு வருகின்றார்களோ அதை சத்திய தர்ம வழிகளில் பாதுகாக்க இவ்விடத்தில் நிற்பதாகவும், மகான்களும், மகரிஷி பதஞ்சலி போன்றோர் அருள்நிலை வாக்கு, சுவடிகள் போன்றவைகளின் வழியாக இந்த சிறப்பை உணர்ந்ததால் இந்த சிறப்பும் வரலாற்று புகழ்மிக்க அன்னையின் அருள் கட்டளையால் ``சமயாள்குடில்’’ என்ற திருப்பெயரை சூட்டி இப்புனிதமிக்க இப்புண்ணிய பாரத பூமியில் மக்களின் குறைகளை எல்லாம் நீக்கும் குடிலாக (குறை நீக்கும் குடில்) இப்பிரபஞ்சத்தில் சிறப்புற சமயாள் குடில் மாரியம்மன் திருக்கோயில் என்ற உன்னதப் பணி இப்புனித நாளாம் தைப்பூசத்தன்று துவக்க இருப்பதையும் இப்புகழ் மிக்க ``சமயாள் குடில்’’ ஸ்தல வரலாற்றையும் இப்பிறவியில் அடியேனுக்கு கட்டளையிட்ட அன்னையை வணங்கி, உங்கள் முன் சமர்ப்பிக்கின்றேன்.